Лукашенко: Реизборот на Путин е сериозен сигнал за Западот
Претседателот на Белорусија Александар Лукашенко вели дека исходот од претседателските избори во Русија е сериозен сигнал за Западот, особено на идеите за протресување на ситуацијата во Русија одвнатре.
– Тие не можеа да го направат тоа на првата линија, па се обидоа да го направат тоа одвнатре, но и тие не успеаја“, вели Лукашенко, цитиран од државната агенција „БелТА“.
Белорускиот претседател рече и дека никој не може да ги принуди луѓето на Белорусија и Русија на ништо.
Тој го пофали изборниот процес во Русија како добро организиран.
– Природно, претседателот Путин мораше да работи многу, видовте. Тој неуморно патуваше низ цела Русија, посетуваше различни места и одговараше на виталните прашања на рускиот народ, коментира Лукашенко.
Според него процесот на планирање и селекција бил совршен и од него како што вели има многу да се научи.
– Сите беа мобилизирани и консолидирани. Луѓето се патриоти и резултатот е совршен. Ова е лекција за нас“, додава белорускиот претседател.