Литургискиот зборник „Отца и Сина и Достојно ест“ на Александар Гулевски е со невматска нотација
Неодамна од печат излезе музичкиот литургиски зборник со невматска нотација „Отца и Сина и Достојно ест“ на Александар Гулевски. Предговорот на зборникот, достапен на македонски, српски, руски и англиски јазик, напишан е од псалтот Никола Попмихајлов, раководител на српскиот византиски хор „Мојсије Петровиќ“ од Белград, кој наедно се јавува и како рецензент на зборникот.
Зборникот е отпечатен со благослов на Неговото високопреосвештенство, митрополит Преспанско-пелагониски и администратор австралиски и новозеландски г. Петар, а во рамките на издавачката дејност на Преспанско-пелагониската православна епархија.
Зборникот содржи четириесет авторски композиции од евхаристискиот канон, компонирани на осум византиски гласа (музички скали) и претставува прво остварување од ваков вид во рамките на автокефалната Македонска православна црква – Охридска архиепископија.
Познато е дека во Македонската православна црква – Охридска архиепископија сè уште се користат литургиски музички зборници со западна нотација, ретко со невматска, и тоа најчесто од српски и бугарски автори (Стеван Мокрањац, Манасиј Поп Тодоров, Петар Динев и др.).
Појавувањето на музичкиот литургиски зборник „Отца и Сина и Достојно ест“ на Александар Гулевски, всушност, ја пополнува празнината од немање на ваков вид музичка литература кај нас од домашен автор, не само во рамките на Македонската православна црква – Охридска архиепископија, туку и во рамките на македонската црковна музика, воопшто.
Печатењето на музичкиот зборник „Отца и Сина и Достојно ест“ го овозможија Преспанско-пелагониската митрополија, црквата „Св. вмч. Димитриј“ – Битола, ДООЕЛ Јосифов, „Пела Роса“ и „Адинг Центар“ од Битола.
(Текстот е објавен во „Културен печат“ број 183, во печатеното издание на весникот „Слободен печат“ на 17-18.6.2023)