Лидерите на ЕУ утре ќе одлучуваат дали ќе дозволат ново одложување на Брегзит
Лидерите во Европската Унија утре ќе одлучуваат дали ќе ѝ дозволат на Велика Британија ново пролонгирање на Брегзит во рок од три месеци, пишува Би-Би-Си.
Се верува дека поголемиот дел од земјите-членки се согласни на таков чекор, но Франција не е расположена за оваа идеја.
Францускиот претседател Емануел Макрон е загрижен дека долго одложување на Брегзит би можело да предизвика нова неодлучност во Британија или неубедливи избори, дознава Би-Би-Си.
Според пишувањата на Би-Би-Си, во понеделник би можело да има итен самит во Брисел, на кој лидерите ќе можат да постигнат договор „лице во лице“.
Британскиот премиер Борис Џонсон инсистира дека Велика Британија ќе ја напушти Унијата следната недела, без или со договор, и дека ќе распише предвремени парламентарни избори доколку ЕУ дозволи продолжување на рокот.
Премиерот на кралството беше приморан да испрати писмо до ЕУ со кое бара продолжување на рокот, под новата легислатива изгласана од пратениците минатиот месец. Џонсон сепак инсистира дека неговата главна полиса е напуштање на ЕУ на 31 октомври, кога е предвидениот рок.