Ле Дриан: ЕУ размислува за санкции против властите во Мали и приватната воена група „Вагнер“
Министрите за надворешни работи на ЕУ денеска се согласија да почнат да работат врз утврдување на правните мерки за воведување санкции против властите во Мали поради недостаток на демократски промени, како и против приватната воена група Вагнер за „анонимно и дестабилизирачко мешање“ во странски конфликти.
Ова денеска го изјави шефот на француската дипломатија, Жан-Ив Ле Дриан, на маргините на состанокот на Советот на министри за надворешни работи во Брисел.
– Ние сме солидарни и решени да воведеме санкции против властите во Мали поради недостатокот на напредок во демократските промени во земјата. Исто така, постои разбирање и заедничка политичка волја за создавање правен механизам на санкции против групата „Вагнер“, која анонимно интервенира во конфликти во странски воени жаришта и спроведува дестабилизирачки активности, додаде францускиот министер.
Извор: МИА