Лазаров: Среќен сум затоа што ова е историска победа за Алкалоид
Maкедонскиот вицешампион Алкалоид стигна до првата европска победа откако во Европската лига на ЕХФ во Скопје вечерва ја совлада Ла Риоха со 28:27.
По натпреварот тренерот на Алкалоид, Кире Лазаров изрази задоволство за историската прва победа во Европа на неговиот клуб.
„Среќен сум бидејќи ова е историска победа за нашито тим. Честитки за моите играчи, честитки и до гостите за фер-плејот. Играв седум години во Шпанија и знам што значи Ла Риоха во државата. Знам многу ракометари од Европа и светот кои сакаа да одат и да учат во Шпанија. Ние ги направивме истите грешки како и претходно, промашивме неколку пенали и удари од шест метри. Меѓутоа ова е дебитантска сезона за многу ракометари во Европа и ова е одлично искуство за нас. Моите ракометари заслужија да победат еден меч. Мило ни е што публиката нè препозна како македонски проект. Сепак, мора да се работи понапорно во иднина за да бидеме поконкурентни во иднина“, изјави Лазаров.