Креативно студио со „Шеа хоуммејд“: Празничната магија ни е најголема инспирација за изработката на новогодишни сапуни
„Секоја состојка е одбрана со грижа и внимание, со цел да создадеме производ што ја чисти, ја негува и ја омекнува кожата“, вели Цветанка.
Приказната за „Шеа хоуммејд“ и за изработката на природни сапуни и козметички производи започнува како хоби, во кои се вклучени Цветанка и нејзините мајка и сестра. Иако тие имаат различни професии (економист, правник и архитект), желбата за експериментирање со природната козметика била голема, па така нивната изработка на природни сапуни прераснала во мал семеен бизнис, кој им ја буди креативноста и е нешто што навистина ги релаксира и ги исполнува.
Цветанка, од каде се роди идејата да почнете да изработувате природни производи за нега на лице и тело?
– Идејата настана спонтано, заедно со мојата сестра и мајка ми. Нашата почетна замисла да создадеме природни сапуни за нега на кожата се случи како реакција на потребата за поголема грижа за кожата во време на пандемијата на ковид-19. Секојдневната употреба на дезинфекциски средства предизвика голем проблем со сувост и иритација на кожата, па така со желба да пробаме да го решиме овој проблем и да бидеме сигурни што користиме за нашата кожа, почнавме со истражување и експериментирање со природни состојки за изработка на сапуни. Преку многу труд, со континуирана едукација и тестирање, успеавме да развиеме формули за сапуни што се природни, без употреба на хемиски супстанции, кои ја чистат и ја хранат кожата, а можат да ги користат и луѓе со чувствителна кожа. Откако ги изработивме првите сапуни, почнавме ние да ги користиме, а потоа ги споделивме со нашето семејство и пријатели. Бевме изненадени од нивната позитивна реакција. Поддршката и одличнaта реакција што ја добивме, не само што нè охрабри, туку и нè мотивираше да ги споделиме нашите производи со други луѓе, кои веќе покажаа интерес за сапуните и почнаа да нѐ прашуваат како може да ги купат.
Во Вашиот асортиман има најразлични и уникатни форми на природни сапуни за тело. Каде наоѓате инспирација за нивната изработка?
– Инспирацијата за нашите сапуни произлегува од различни извори. Понекогаш, таа доаѓа од годишните времиња, од самата природа – вообичаено од боите и текстурите што ги забележуваме околу нас, а има и моменти кога инспирацијата ни доаѓа при самата изработка на сапуните. Креативната енергија и идеите се јавуваат спонтано и постепено, па така, од поедноставни форми на почетокот, почнавме да креираме разновидни форми како сапуни во облик на парче торта, крофна, мафини… Покрај тоа што сакаме да изгледаат убаво, сакаме тие да бидат и убаво спакувани, па затоа голем акцент ставаме и на самото пакување и декорирање. Во овој период, за време на новогодишните празници, нашата инспирација доаѓа од празничната магија, па така нашите последни сапуни се со уникатни новогодишни мотиви и бои. Подготвивме и новогодишни комплети со нашите производи, кои сметаме дека би биле идеална, уникатна и поразлична идеја за подарок.
Како изгледа процесот на изработка и колку време Ви е потребно да ги изработите Вашите природни производи за нега на лице и тело?
– Процесот на изработка на нашите сапуни е внимателен и вклучува различни етапи. Тие се изработуваат исклучиво по пат на ладен процес, со цел да се задржат сите хранливи вредности од состојките кои ги користиме. Се загреваат маслата и путерите на ниска температура, потоа следува процесот на сапунификација. Следната фаза е лиење на смесата во форми со различни облици, во зависност од дизајнот на сапунот. Откако сапуните ќе се излеат во формите, започнува фазата на сушење на сапуните што трае околу 4 до 6 недели. Во овој период сапуните се оставаат да се сушат и да созреат пред да бидат спремни за употреба. Тоа значи дека за целиот процес на изработка на нашите природни сапуни, се потребни околу 4 до 6 недели. Ова го вклучува и времето потребно за изработка, сушење и стареење на сапуните, што резултира во висококвалитетен производ готов за употреба.
Користите 100 отсто природни состојки. Кажете ни што содржат Вашите производи?
– Најгорди сме на фактот дека нашите производи се составени исклучиво од природни состојки, што ги прави идеални за кожата и за околината. Тие се рачна изработка а за нив користиме кокосово масло, маслиново масло, рицинусово масло, бадемово масло, шеа путер, какао путер и авокадо путер. Овие масла се познати по своите хидратантни и заштитни својства за кожата, ја негуваат, оставајќи ја хидрирана, здрава и блескава. Мирисот во нив потекнува од чистите есенцијални масла што имаат антибактериски, антивирусни и релаксирачки својства. Секоја состојка е одбрана со грижа и внимание, со цел да создадеме производ што ја чисти, ја негува и ја омекнува кожата. Освен нашите природни сапуни, изработуваме и балсам за усни, кремови за раце и лосиони за тело, кои исто така се изработени од овие природни масла и путери.
Дали Вашите производи содржат некои алергени и колку се безбедни за нежната кожа кај децата?
– Како што напоменав и претходно, нашите сапуни се изработени исклучиво со природни состојки, создадени со цел да бидат нежни и безбедни за сите типови кожа, вклучувајќи ја и детската кожа. Тие не содржат штетни материи или агресивни состојки што често се наоѓаат во комерцијалните сапуни и производите за нега, па така софистицираните формули што ги користиме за нивна изработка, ги прават безбедни за употреба и кај децата.
Според Вашето искуство, колку рачните изработки се ценети кај нас и каков е интересот на луѓето токму за Вашите природни производи?
– На наше големо задоволство во Македонија има сѐ повеќе луѓе што се интересираат, сакаат да користат природни производи и го препознаваат квалитетот и посветеноста во рачните изработки. Исто така, особена заинтересираност забележуваме кај сапуните во форми кои се многу уникатни и се одлична идеја за подарок. Многу сме среќни и задоволни поради големиот број позитивни повратни информации што ги добивме и знаењето дека нашите производи направиле позитивно влијание и предизвикале задоволство кај нашите клиенти, па тоа нè мотивира и понатаму да се развиваме и да го зголемуваме асортиманот на производи.
Цветанка ќе им подари два комплета со новогодишен мафин-сапун и балсам за усни на двајца читатели на „Слободен печат“.
Доколку ви се допадна нејзината приказна и сакате да добиете уникатна природна козметика, пријавете се на имејл-адресата [email protected], со назнака „За подарок“, каде што ќе ни ги пратите вашите лични податоци – име, презиме, телефонски број и адреса на живеење.
Со среќа!