Ковачевски: ВМРО-ДПМНЕ нема идеја, Левица со своето дејствување стана десница и ги зема во целосно заложништво
Ние имаме обврска да го држиме кормилото на земјата во вистинскиот, европски правец и да ги спречиме сите обиди за негово попречување, затоа што постојат закани на европскиот пат на земјава. Левица и Димитар Апасиев, со опасниот популизам, со својата анти-НАТО и анти-ЕУ потпалувачка реторика е фактор кој работи на загрозување на европскиот пат, порача претседателот на СДСМ Димитар Ковачевски вечерва на трибината организирана во Штип.
Посочи дека ВМРО-ДПМНЕ нема никаква идеја освен да шири лажни вести и деструкции.
-Самите го признаваат тоа. Вчера Николовски од ВМРО-ДПМНЕ по телевизии вели „план ќе ви кажеме кога ќе дојдеме на власт”. Па добро се слушаат ли што зборуваат. Немаат ниту план, немаат идеја, немаат визија за иднината и немаат понуда за граѓаните. Затоа Левица со своето дејствување стана десница и ги зема во целосно заложништво. Потпалувачките политики може да ја уништат иднината на земјата и да го попречат европскиот пат и ние тоа не смееме да го дозволиме, рече Ковачевски.
– Со сето мое менаџерско и економско искуство, со нов економски план можам да ја донесам општествената промена којашто ни е потребна. Потребна ми е поддршка, заедно со вас, заедно со граѓаните да ги направиме промените и наредната година да се случи економскиот пресврт. Заедно да изградиме европска Македонија, која ќе биде центар на зелена енергија, рамноправна членка на ЕУ, држава на можности за младите, држава сигурна за пензионерите. Да живее Штип, да живее СДСМ, да живее европска Македонија, додаде Ковачевски.
