Косово е една од темите на разговор меѓу Бајден и Мелони, кои повикаа на деескалација и помирување во регионот
Претседателот на Соединетите Американски Држави, Џо Бајден, вчера во Белата куќа ја прими италијанската премиерка Џорџа Мелони, а по средбата беше објавено и заедничко соопштение во кое, меѓу другото, се зборува и за Западен Балкан и за ситуацијата на Косово , пренесува Репортерс.
Бајден и Мелони повикаа на деескалација и помирување во регионот на Западен Балкан, нагласувајќи дека САД и Италија ќе ја зголемат координацијата за таа цел.
„САД и Италија ја потврдуваат својата заедничка посветеност на безбедноста, стабилноста и просперитетот на Западен Балкан и нивната долгорочна поддршка за евроатлантската интеграција на регионот. Тие се решени да ја зајакнат координацијата за да се залагаат за деескалација и помирување врз основа на клучната улога на Quinta“, се вели во соопштението.
Се додава дека САД ја поздравуваат посветеноста на италијанската влада на Западен Балкан, вклучувајќи го и придонесот на италијанските вооружени сили во мисиите КФОР, ЕУЛЕКС и ЕУФОР. На средбата се разговарало и за војната во Украина. Италијанската премиерка рече дека е „горда“ на активностите на Италија во помагањето на Украина.
Од друга страна, Белата куќа го смета премиерот на Италија за силен партнер во помошта што и ја дава на Украина.