Кошаркарките на МЗТ Скопје Аеродром до првиот трофеј во Купот „Благоја Георгиевски – Буштур“
Една петорка, и две доминантни Американки беа доволни за екипата на МЗТ Скопје Аеродром да излезе како победник против Баскет Кам 2011 (75:60) во големото финале во женска конкуренција во рамките од кошаркарскиот Куп на Македонија „Благоја Георгиевски – Буштур“ кој се организира во СРЦ „Кале“.
Кошаркарките на МЗТ за првпат учествува на завршниот турнир од Купот, а интересно до победата во финалето стигнаа само една петорка во текот на сите 40 минути, и тоа против двократниот освојувач на овој трофеј, Баскет Кам 2011 од Македонска Каменица.
На крајот од првата четвртина МЗТ имаше убедливи 21:8, а после 20 минути дебитантот водеше со 38:26. Долго време се обидуваа кошаркарките од Македонска Каменица да ја сведат разликата на едноцифрена. Успеаја во тоа во 28 минута кога се приближија на 41:49.
Но, со серија од девет поени, на крајот на третата четвртина МЗТ дојде до огромни 58:41. Аеродромки до првиот трофеј во Купот „Благоја Георгиевски-Буштур“ дојдоа најмногу благодарение на Американките Ли и Симонс. Ли реализираше 27 поени, додека Симонс запиша „дабл-дабл“ учинок од 24 поени и 12 скокови.
На спротивната страна најрасположена беше Николов со 23 поени, додека Тасевски забележа 15 поени.
Кошаркарката на МЗТ Скопје Аеродром, Џој Симонс, беше прогласена за најкорисна на завршниот турнир „Благоја Георгиевски-Буштур“. Искусната Американка презентираше квалитет и на двата натпревари кои нејзината екипа ги одигра, и ги доби на турнирот во СРЦ „Кале“. А во финалниот натпревар го надгради она што го постигна во полуфиналето, против Вардар.
Ги одигра сите 40 минути, притоа реализираше дабл-дабл ефект изразен со 24 поени и 12 скока, сосема заслужено го доби МВП признанието од рацете на македонската кошаркарска легенда Ѓорѓи Чековски, сега во улога на тим-менаџер на сениорскиот национален тим.
– За разлика од полуфиналниот натпревар кога лошо почнавме и бркавме разлика, во финалето успеавме да го контролираме резултатот цело време. Игравме добро и во напад и во одбрана и сум задоволна од прикажаната игра на кошаркарките. Ова е прв трофеј на женскиот кошаркарски клуб МЗТ Скопје и мој прв освоен пехар, така што се радувам на тој успех. Им честитам на сите и ова е мотив и основа за понатамошна работа – рече Вела Красниќ, тренерот на новиот победник во Купот.