Кога е вистинското време да започнете со вежбање по породувањето!
Речиси и да нема жена која е задоволна со својот изглед откако на свет ќе донесе нов живот. Виснати гради, голем стомак, стрии, подочници…
Ова се само дел од „последиците“ на 9-месечната бременост.
Сепак, колку и да не сте задоволни од својот физички изглед, обидете се барем во првите неколку месеци да се стрпете и да не ја трошите вашата енергија за правење вежби, кои ќе ви го подобрат физичкиот изглед. Напротив, сета ваша енергија и време треба да му ги посветите на вашето бебе.
Гинеколозите и фитнес-инструкторите предупредуваат дека жените, поради преголема желба за поскоро да си ја вратат старата фигура, пребрзо по породувањето се враќаат на вежбањето. Со тоа го изложуваат својот ослабен стомак и карличните мускули на опасност. Затоа предупредуваат жените да почекаат најмалку шест месеци од породувањето пред да почнат да трчаат или интензивно да вежбаат.
Многу жени не сфаќаат колку се опасни последиците, доколку не му дозволат на своето тело да закрепне по породувањето.
Иако физичката активност е генерално добра за човечкото здравје, доколку вежбите се прават на погрешен начин, а посебно во периодот кога телото е ослабнато по породувањето, може да имате повеќе штета отколку корист од него.
Некои жени чувствуваат дека мораат да се ослободат од својот стомак веднаш после породувањето. Поради тоа прават склекови, стомачни и слични вежби, кои можат да влошат одредени состојби што веќе настанале како последица на бременоста, на пример раздвојување на стомачните мускули.
Но, вистината е дека без разлика на тоа дали бременоста била лесна или тешка, породувањето природно или со царски рез, или пак била користена анестезија, телото на жената во првите неколку месеци не смее да биде многу оптоварено физички.
На новата мајка ѝ се доволни сите оние физички и хормонални промени, а вежбањето може да предизвика дополнителни проблеми, па дури и посериозни нарушувања, кои може да се избегнат само доколку се следи природниот процес на закрепнување.