Промоторот на книгата, Живко Грозданоски, посочува дека „во малечкото море од книги што ги разлистуваме и читаме секојдневно ’Премин во времето‘ е дело што зближува светови. Преводот и објавата на оваа книга кај нас е автентичен просветителски чин: по прочитот на оваа книга се чувствувам не само побогат, туку и поблизок до самиот себе.“

– Една од клучните одлики на оваа книга е нејзината густина, од повеќе аспекти. Романот е преплавен со слики (навидум само патем сместени таму) кои се исполнети со симболика и со метафоричен набој. Но, пред сè „густината“ доаѓа од минуциозно доловениот историски пејзаж, со сите општествено-политичко-економски врски: од Пеќ преку Приштина, Тирана, Скопје, Битола и Охрид, па сè до Солун, Неапол и понатаму кон Египет, Франција, Англија и Америка.

Целото дејствие е условено од влијанието на световните и на духовните идеологии, и посебен простор им е отстапен на конкретни ликови „оптоварени со идеализам и мисија“. Во сличен контекст, со одмереност и без романтизирање е опишан соживотот на албанското и на српското население во Косово, исполнет со конфликти, но и со длабоки пријателства – истакнува Грозданоски.

Миѓен Келменди (1959) е автор и публицист од Косово. По првпат станува познат како вокал на музичката група „Ѓурмет“. Во периодот помеѓу 1978 и 1983 година го завршува Правниот факултет на Универзитетот во Приштина; се ангажира на одговорни работни позиции во РТ Приштина, а подоцна и во американско-албанската телевизија „Викторија“ во Њујорк. Во периодот 2000/2001 е прв директор Албанец на РТ Косово. Автор е на повеќе книжевни дела.

(Текстот е објавен во „Културен печат“ број 183, во печатеното издание на весникот „Слободен печат“ на 17-18.6.2023)