Кластер „избори“: Бројот на активни носители на ковид-19 во Косово за првпат е над 10.000
Бројката на активни носители на коронавирусот во Косово за прв пат надмина 10.000 и, вклучително новозаболените 529 во изминатото деноноќие, моментно изнесува 10.091, јави дописникот на МИА од Приштина.
Во денешниот извештај на Националниот институт за јавно здравство на Косово се наведува и дека во текот на вчерашниот ден починале шест пациенти, со што бројот на жртви на пандемијата од нејзината појава пред една година достигна до 1.674.
Од досега тестираните 341.443 лица, од кои 2.888 во текот на вчерашниот ден, позитивни на коронвирусот биле вкупно 74.748 лица.
Последните 24 часа се регистрирани и 333 излекувани од ковид-19, со што бројката на лица кои ја совладале болеста се искачи на 62.983.
Последните неколку недели во Косово се забележува пораст на бројот на новозаболени од ковид-19, кој секојдневно изнесува меѓу 500 и 600, што, според здравствените власти, е последица на непочитувањето на мерките за спречување на ширењето на пандемијата од страна на политичките партии за време на кампањата за вонредните парламентари избори што се одржаа на 14 февруари.