Киелце прв финалист во ракометната Лига на шампиони
Ракометарите на Киелце ќе играат во утрешното финале во Лигата на шампионите откако денеска во првото полуфинале од завршниот турнир што се игра во „Ланксес“ арената во Келн, со 37:35 го совлада Веспрем.
Полскиот тим до победата дојде со одлична игра во второто полувреме во кое успеаја негативата од два гола од првиот дел да ја претворат во позитива од четири гола и во финишот ја задржаа предноста за триумф и пласман во финалето. Македонскиот репрезентативец не беше во тимот на Веспрем.
Натпреварот започна со израмнета игра се до 10-тата минута кога Веспрем дојде до плус два (7:5) по головите на Лауге и Мае. Во првото полувреме одлично бранеше голманот на Веспрем, Коралес, а тоа го искористија неговите соиграчи да поведат со 14:11, а во последната минута влегоа со предност од три гола (17:14). Но, по тајм-аутот на Душебаев, Турна погоди на пет секунди до крајот за 18:16.
Второто полувреме започна со фуриозна игра на Киелце кој направи серија од 7:2 за девет минути и поведе со 23:20. Постот на Веспрем од шест минути без гол го прекина Маргуч, но неговите соиграчи направија уште две грешки за водство од 25:21 за Киелце.
Ракометарите на Веспрем не се предаваа, успеаја да се приближат на минус два (29:27) во 49 минута, по што следеше период во кој се играше гол за гол се до 54 минута поранешните вардарци, Душебајев и Карачиќ погодија за 34:30 и го трасираа патот на Киелце во финалето.
Најдобри стрелци во победничкиот тим беа Морито со седум и Карачиќ со пет гола, додека кај Веспрем се истакнаа Штрлек со седум и Ненадиќ и Лауге со по шест гола. Ривал на Келце во големото финале ќе биде победникот од дуелот меѓу Барселона и Кил.аа