Крајот на првата, пролетна сезона на 45-тите „Денови на македонска музика“ (ДММ) ќе биде означен со камерно-солистичкиот концерт насловен „Надеж“, што ќе се одржи на 30 април во Музеј на македонската борба, со почеток во 20 часот.

Фестивалскиот подиум, традиционално и оваа година ќе им биде отстапен на младите музички надежи, студенти и дипломанти на музичките универзитети во државата.

Со ваквите иницијативи кои имаат за цел континуирана презентација како на новото музичко творештво, така и на новото исполнителство, фестивалот овозможува да се создаде компактна, генерална слика за патеката на движење на современата музика и исполнителство на нашите простори.

На програмата на концертот „Надеж“ ќе бидат дела од авторите Тодор Бојаџиев, Илија Пејовски, Маријана Јаневска, Стојан Стојков, Филип Иванов и Дамјан Темков кои ќе ги изведат младите уметници Ана Спасовска, Ивона Базгалоска, Памела Велкова, Маја Михајловска и Леона Кондратенко. Пијано придружба е Елена Атанасовска – Ивановска.

Вториот дел од програмата на 45. издание на фестивалот „Денови на македонска музика“ ќе се одржи во септември, кога ќе бидат врачени и годишните награди на СОКОМ.