Јунајтед се откажува од Санчо, решението на крилната позиција го најде во Португалија
Манчестер јунајтед најверојатно ќе се откаже од можноста да го донесе поранешниот играч на Сити, Џејдон Санчо. Екипата на Борусија Дортмунд која минатото лето ја одби понудата на Јунајтед, сега ја намали цената која ја бара за англискиот репрезентативец и таа изнесува околу 90 милиони евра, но и таа сума е преголема за „црвените ѓаволи“ бидејќи пандемијата на коронавирусот финансиски го погоди клубот.
Поради тоа, Јунајтед на лето ќе се обиде да донесе уште еден играч на Спортинг Лисабон од каде го купи и Бруно Фернандеш кој е најдобар играч на екипата оваа сезона.
Нова мета на Јунајтед е младиот 22-годишен Педро Гонсалвеш кој исто како и Санчо игра по десната крилна позиција.
Гонсалвеш сезонава игра во неверојатна форма, на 21 натпревар во португалската Примеира ток постигна 15 гола и има четири асистенции и е предводник на тимот кој сигурно чекори кон шампионската титула. Спортинг Лисабон за неговите услуги бара 55 милиони евра, а се чини дека „црвените ѓаволи“ се подготвени да ја платат оваа сума.