Ја напуштаат ли мигрантите балканската маршрута?
Бројот на мигрантите на балканската маршрута во јануари годинава бил преполовен во однос на претходниот месец, покажале податоците на Европската унија, а со усогласувањето на земјите од регионот со визниот режим на Унијата, се очекува тој број и понатаму да паѓа, пишува црногорскиот весник „Вијести“.
Весникот се повикува и на изјавата на еврокомесарката за внатрешни работи Илва Јохансон, која пред одборот за граѓански слободи, правда и внатрешни работи на Европскиот парламент неодамна кажала дека трендот на намалување бил забележан уште во декември, кога бројот на илегални мигранти кои минуваат низ Балканот бил намален за 30 отсто. Јохансон, пак, тврдела дека ова намалување се должи на вонредните мерки воведени од земјите-членки и Европската комисија.
Според податоците на Европската гранична агенција „Фронтекс“, долж балканската рута во 2022 година биле регистрирани 145.600 илегални поминувања кон ЕУ, што е зголемување за 136 отсто во однос на 2021 година.