Изрешетан автомобил во Топанско Поле-застрелани две лица
Двајца се убиени ноќеска во населбата Топанско Поле во Скопје. Жртви се Африм Бериша (28) и Бурим Вардари (24). Идентитетот на напаѓачите е непознат и тие се во бегство. Двојното убиство се случило ноќеска околу 3 часот, на улица „Македонско-косовска бригада“, кај бензинската пумпа на „Макпетрол“.
Од полицијата велат дека добиле пријава во 2:35 часот за пукање на бул. „Македонско – Косовска бригада“.
– По излегување на местото на настанот од страна на полициски службеници, било пронајдено патничко моторно возило „цитроен“ со скопски регистарски ознаки и две лица кои не давале знаци на живот. Од страна на лекар од Итна медицинска помош била констатирана смрт кај двете лица, велат од МВР.
Утврдено е дека убиените се двајца скопјани. Полициските екипи на местото на двојното убиство пронашле чаури од пиштол и автоматска пушка.
Од МВР додаваат дека се преземаат мерки и активности за расчистување на случајот.Две лица се убиени рано утринава, околу 03:00 часот на ул. Македонско-косовска бригада во скопската населба Топанско Поле во Скопје, а од МВР го потврдија случајот.