Израел извршил 18 воздушни напади во Сирија: Медиумите јавуваат за најмалку 57 загинати лица
Најмалку 57 лица загинаа во воздушните напади на израелски авиони во источниот дел на Сирија врз пунктови на владини безбедносни сили и нивните ирански сојузници, објави весникот „Маарив”. Сирискиот центар за мониторинг на човековите права, со седиште во Лондон, претходно соопшти дека во нападите загинале 23 лица.
Шефот на Сирискиот центар, Рами Абдел-Рахман изјави дека околу 18 израелски напади биле извршени врз магацини за оружје и воени позиции во источна Сирија, при што загинале најмалку седум припадници на владините безбедносни сили и 16 сојузнички војници, вклучително и борци на либанското шиитско движење Хезболах и милициите поддржани од Иран, објави агенцијата ДПА.
Сириските државни медиуми ги потврдија воздушните напади без да соопштуваат жртви.
– Израелскиот непријател изврши воздушна агресија во источните градови Деир ал-Зур и Ал-Бу Камал, соопшти сириската новинска агенција САНА.