Измените на Законот за минерални суровини ќе ја олеснат корупцијата, реагираат екологистите
Измените на Законот за минерални суровини се катастрофална грешка и ќе бидат срам за државата бидејќи само ќе ја олеснат корупцијата и перењето пари во сферата на рударството, му порачаа на министерот за економија Крешник Бектеши струмичките активисти, кои водат повеќегодишна борба против отворањето на рудникот за бакар и злато Иловица.
Екологистите од „Здрава котлина“ сметаат дека се овозможува во иднина крајниот сопственик на компаниите кои ја експлоатираат рудата во Македонија да може да биде и нерезидентно физичко лице, а не како досега правно лице со седиште во државава, што е легална дупка во закон за перење на пари.
Предложените измени на Законот за минерални суровини што треба да се најде на дневен ред на 18 јануари се спорни и за О2 Коалицијата и за други еколошки организации како и за Институтот за комуниколошки студии, Зелениот институт и други, кои сметаат дека со нив долгорочно се загрозуваат природните ресурси. Тие вчера со писмо му се обратија на министерот за економија и побараа пакетот измени да се тргне од дневен ред на Собранието и да не се носи по скратена постапка, без да се слушне мислењето на јавноста.