Изложбата „Врамена различност“ од Мартин Џепароски ќе биде отворена во „Порта Македонија“
Самостојната изложба „Врамена различност“ ги претставува истражувањата на авторот Мартин Џепароски за различностите, но и за сличностите меѓу луѓето и животните. За добрината на св. Мартин, кој својот плашт го подарува на сиромашниот и скудно облечениот, но и за трансформациите на самиот современ човек, кој визуелно и суштински се видоизменува.
Затоа светот на човекот и светот на животните во визуелните претстави е толку различен: од реално до иреално, од генетски немодифицирано до генетски модифицирано, од здраво до нездраво и до мутирано.
Авторот ослободен од правилата, но со голем, силен и експлозивен набој на емоции, верува дека на платната може да талка кон она што сака да го претстави, а во основа е непретставливо. Сето ова на тој начин станува само еден дел од светот на неговите врамени различности, посочено е во најавата на изложбата.
Изложбата „Врамена различност“ ќе биде отворена на 3 април (понеделник), во 19 часот, во „Порта Македонија“.
Авторот Мартин Џепароски е роден на 26.10.1991 година во Скопје. Во 2010 година го завршил средното уметничко училиште „Лазар Личеноски“ во Скопје, отсек вајарство. Дипломирал на вајарство и сценографија на ФЛУ во 2015 година, во класата на проф. Ибрахим Беди.
Проектот е поддржан од македонското Министерство за култура, Музејот на македонската борба за самостојност – Скопје и „Порта Македонија“ – Скопје.