Изложбата „Алиса во Апсурдистан“ е покана за преиспитување на секојдневието кое нѐ уморува
Во рамките на програмата на „Скопско лето“ на 29 јули (сабота), во 20 часот, во објектот Сули-ан ќе биде отворена изложбата „Алиса во Апсурдистан“ од Јулија Петровска. На отворањето, со специјално подготвен соло сет на клавијатура и теремин ќе настапи Ива Дамјановски, пијанистка, тереминистка и поетеса.
Станува збор за трета самостојна изложба на Јулија Петровска по „Антропоморфна боженственост“ (19-21.06.2023, во Мобилна монтажна галерија на ЦСУ) и „Курбан-даршан“ (28.06.2023, во „Буква“).
– Со „Алиса во Апсурдистан“ ќе изложам околу 15-ина дела. Половина од делата се акрил на платно (некои со колаж), а другата половина (формат метар на метар) е комбинација од „pouring“ (техника на излевање) на боја за традиционално ебру на специјално подготвено платно, со линопринт и колаж – објаснува авторката.
Не можејќи „функционално“ да се вклопи во системот, Алиса бидува алката што чкрипи, што го заглавува механизмот добро подмачкан со двојни стандарди и опортунизам – слонот во продавница за кристал. Не знаејќи како да најде разврска за клопчето во кое сѐ повеќе се заплеткува, Алиса, се смалува себе си и тргнува во потрага по дупката на зајакот, надевајќи се дека таму ќе најде одговори за сопствената „очуденост“.
– Изложбата „Алиса во Апсурдистан“ е покана за преиспитување на секојдневието кое нѐ уморува, кое неповратно ни ја цица животната енергија оставајќи нѐ со празни раце и мамурна главоболка. Алиса е мој обид ведро и со духовито шаренило да канализирам дел од чемерот што ми се има напластено низ четири декади битисување во нашава чудесна Македонија – посочува Јулија Петровска.
Jyлијa Пeтpовска дипломира нa Филолошкиот факултет „Блажe Koнecки“, отсeк преведувањe на Катедрата по италијански јазик и книжевност и британски културолошки студии. Од 2012 до 2016 rодина живее и работи во Иcтaнбул, кaдe го изучува турскиот јазик. Преведува, толкува и предава јазици повеќе од 15 години.
Покрај преведувањето литература, нејзини пасии се и музиката и визуелните уметности. Нејзините ликовни дела, навидум нежни и аморфни, се критика на современото општество и улогата на жената во него.