Изложба на сликарот Киро Урдин ќе биде отворена во Букурешт
По неодамнешниот успешен настап во галеријата „Амадлози“ на Африканскиот центар за културно наследство во Мајами, Флорида, со изложбата „Предци“, македонскиот мултимедијален уметник Киро Урдин на 2 август ќе се претстави и во Букурешт, Романија.
Во еминентната галерија „Константин Бранкуши“, сместена во рамките на Центарот за конференции во импозантната зграда на Романскиот парламент, нашиот уметник ќе се претстави со нова поставка на изложбата „Табула Раса“, на површина од близу 600 квадратни метри. На два монитори во галеријата, посетителите ќе можат да ги проследат документарните филмови на Урдин, „Планетариум“ и „Табула Раса“.
Изложбата, која ќе биде отворена на Илинден (2 Август) и ќе трае до 31 август, финансиски е поддржана од Министерството за култура на Северна Македонија, медиумски спонзор е каналот „ТВ Културал“ на Романската национална телевизија, а помагатели се нашата амбасада во Букурешт, „Пивара“ Скопје, винарницата „Попова Кула“ и „Меана“, Букурешт.
Куратор на изложбата е историчарката на уметност Марика Теохаревска, а комесар на проектот е историчарот на уметност Јане Теохаревски.
(Текстот е објавен во „Културен печат“ број 189, во печатеното издание на весникот „Слободен печат“ на 29-30.7.2023)