Италијански олимпиец почина од коронавирус
Италијанецот Донато Сабиа почина во 56. година од коронавирусот, објави Италијанскиот олимписки комитет (ЦОНИ).
ЦОНИ исто така објави дека Сабиа е првиот италијански олимпиец кој починал од ковид-19.
Донато Сабиа почина во родндиот град Потенца, на југот на Италија, откако пред 19 дена од коронавирус почина и неговиот татко.
– Ова е трагедија во трагедија. Донато беше личност која не можевте да не ја сакате – изјави Алфио Џиоми претседателот на Италијанската атлетска федерација.
Донато Сабиа во кариерата на две ОИ беше финалист на трката на 800 метри, на Игрите во Лос Анџелес 1984 година го освои петтото место, додека четири години подоцна во Сеул во истата дисциплина беше седмопласиран.
Најголемиот успех Сабиа го имаше на Европското првенство во сала 1984 година кога го освои златниот медал, а на Медитеранските игри во 1983 година го освои сребрениот медал на штафетната трка 4х400 метри.