И без рестрикции, малите дуќани ги исклучија рекламите и излозите
Златарници, фризерски салони, пиљарници, училишта за странски јазик и мали бутици, со првиот мрак ги гаснат излозите и светлечките реклами за да заштедат и да ги намалат своите сметки за струја. Понекаде навечер мижурка само безбедносна светилка, а преку ден во дел од малите занаетчиски дуќани не ги палат ниту греалките, бидејќи индустриската струја ги „изгоре“ во ова време кога имаат се помалку муштерии. И без да се прогласат рестрикции, во населбите, освен уличното осветление, останаа да светат само излозите на големите маркети, но и билбордите од локалните избори. Агрон Фазлији, претседател на Занаетчиската комора на Македонија, за „Слободен печат“ вели дека скапата струја ќе ги сотре малите и микро фирми ако државата не им излезе во пресрет со некои мерки и субвенции. ЗКРСМ комора веќе доставила барање до Владата и Министерството за економија да се разгледа можноста за воведување посебна ставка за занаетчиите.
– Не бараме да плаќаме струја како домаќинствата, туку да нѐ стават во друга категорија – додава Фазлији, загрижен и за најавената енергетската криза и предвидувањата дека можно е да се зголеми цената на електричната енергија.
Занаетчиите, малите и микро фирми со години плаќаат индустриска струја која е 100 отсто поскапа. Тоа ви следува уште со самиот упис кога ќе регистрирате деловен простор. Во ист кош со големите компании се златари, бербери, шнајдери, иако потрошувачката на овие микро и мали занаетчиски дуќани, воопшто не може да се спореди со потрошувачката кај поголемите индустриски капацитети. Како е можно еден фен или бор машина да трошат толку многу струја? Во некои микро и малите занаетчиски дуќани, едвај се вклучува дури и греалка, а сметките се огромни. Затоа бараме микро и малите претпријатија да се стават во посебна ставка и да не плаќаат скапа индустриска струја – објаснува Фазлији.
Во земјава има 6.000 самостојни вршители на дејност во кои работат околу 15.000 лица, потсетува Фазлији, кој е скептичен дека во политичката криза некој ќе има разбирање за нивните проблеми.
Пандемијата ни нанесе огромен удар и за жал се уште трае, а сега се најавува и зголемување на минималната плата, што ќе биде дополнително оптоварување за занаетчиите – додава Фазлији.
Мерката со која Владата обезбеди плата од 14.500 денари за вработените со антикризните мерки за приватниот сектор беше доволна само за оние што имаа „пари под перница“, а за оние се крпат од месец за месец, сумите не беа доволни ни да се покријат основните трошоци како придонесите за плати, сметки за комуналии и кирија за објектите.