Генералниот секретар на Обединетите нации Антонио Гутереш пред почетокот на затворената седница на Советот за безбедност на ОН изјави дека „дури и војните имаат правила“ во врска со ситуацијата во Израел и Појасот Газа и повика на заштита на цивилите во војната меѓу израелските безбедносни сили и исламистичкото движење Хамас кои, како што рече, „никогаш не смеат да се користат како жив штит“, пренесуваат светските медиуми.

-Преместувањето на повеќе од милион луѓе низ густо населената воена зона на место без храна, вода или засолниште, кога целата територија е под опсада, е крајно опасно и во некои случаи едноставно не е можно, рече Гутереш за време на кратките изјави во седиштето на ОН во Њујорк.

Земјите го повикаа Израел да го одложи нападот врз северниот дел на Газа. Милитантната група, која ја контролира густо населената палестинска територија, вели дека ќе се бори до последната капка крв и им порача на жителите да не одат никаде, иако Израел им нареди да се евакуираат на југ од енклавата во рок од 24 часа.

Некои Палестинци ја послушаа таа порака, но попладнево имаше неколку знаци за масовен егзодус.