Селекторот на фудбалската репрезентација на Грузија, Вили Сањол, најавува игра на победа на неговите избраници на утрешниот натпревар против Македонија на Националната Арена „Тодор Проески“ во рамки на третото коло од групата 4 во дивизијата Ц од Лигата на нации.

Грузија во првите две кола оствари две убедливи победи, против Гибралтар на домашен терен од 4:0 и на гости против Бугарија од 2:5.

Македонија пак, настапот во Лигата на нации го отвори со реми во Разград против Бугарија (1:1) и триумф од 2:0 на гостувањето во Гибралтар.

Сањол вели дека неговите фудбалери посакуваат победа што би претставувала еден вид одмазда за поразот во финалето на бараж натпреварот за пласман на ЕП 2020.

– Максимално ја почитуваме Македонија, за која не врзуваат болни сеќавања од Тбилиси. Домаќините се фаворити на овој меч, не ние. Но тоа не значи дека однапред се предаваме. Напротив, дојдовме тука по победа затоа што Македонија е наш должник. Имаме два одлични натпревари во низа, и сега сакаме тоа да продолжи. Овој натпревар може да биде многу важен во битката за првото место, затоа сакаме три бода – изјави  Сањол на прес-конференцијата.