Во рамките на „Скопско лето“ на 23 јули (сабота), со почеток во 20.30 часот, во Сули ан – Факултет за ликовни уметности во Скопје групата „Баклава“ ќе одржи концерт со наслов „За Скопје со љубов“.

Вокален солист на групата „Баклава“ е Елена Христова која, покрај пеењето, е композитор, истражувач и документарист. Позната е како творец и изведувач во својот матичен бенд „Баклава“, но и по многубројните проекти, како бендот „Баба Зула“ од Турција, бендот „Бекјард џез оркестра“, коавтор на проектот „Биоскопија“ со Горан Трајкоски. Соработник е во многу проекти и бендови како во Македонија и Турција, кои се нејзини живеалишта, така и ширум светот.

Концертот „За Скопје со љубов“ е музичка разгледница во која таа ги опејува убавините и ги раскажува приказните на својот роден град Скопје. На сцената во Сули ан таа ќе изведе комплетно нови песни посветени на градот Скопје и низ приказни и фотографии ќе го сведочи нивното создавање.