Најголемиот котел, стар повеќе од педесет години ќе продолжи да загадува во срцето на Скопје. Гинеколошката клиника „Мајка Тереза“, во Чаир и оваа зима ќе се грее на мазут, ниту оваа сезона ќе нема негова замена со еколошки начин на греење.

Од болницата веќе се снабиле со мазут, за кој одвоиле од својот буџет 50.000 евра.

Министерството за здравство постојано ветува промена на системот за греење, со природен гас не само на Гинекологија Чаир, туку и на болниците во Куманово и во Струмица. Министерот Венко Филипче неодамна истакна дека проектите се подготвени, тие влегле во тендерскиот план за гасификација што ќе започне да се реализира како приоритет, во овие три јавни здравствени установи.

Инаку, во земјава има вкупно 17 болници кои се греат со мазут, чиј чад испушта огромни ПМ 10 честички во воздухот. Минатата зима, скопскиот градоначалник Петре Шилегов, тогаш на клиниката и даде рок од 30 дена за изнаоѓање решение, или во спротивно, велеше, дека ќе ставеле катанец.

Сега од Град Скопје велат дека една мерка не е доволна, туку ветуваат долгорочна стратегија.