Потрошувачката на пиво во Германија, некогаш омилениот пијалок во земјата, паднала за 4,5 отсто во 2023 година по краткото закрепнување по пандемијата, објави Федералниот завод за статистика во Визбаден, пренесува Хина. Додека во 2022 година беше забележан пораст од 2,8 отсто по речиси двегодишен пад за време на пандемијата на коронавирус, во 2023 година потрошувачката на пиво повторно падна за 4,5 отсто, на вкупно 8,4 милијарди литри. Безалкохолното пиво и пивото увезено од земји надвор од Европската унија не се вклучени во статистиката. Претставници на околу 1.500 пиварници во Германија изразија загриженост поради продолжувањето на трендот на намалување на потрошувачката на пиво.

„2023 година беше мрачна година за германските пиварници. Падот на потрошувачката во угостителските објекти се чувствува и во количината на продадено пиво“, вели Холгер Ајхеле, директор на Здружението на германски пивари.

Тој изрази благ оптимизам во однос на поттикот што може да го добие консумацијата на пиво од одржувањето на Европското фудбалско првенство во Германија. Ајкеле ги обвини малопродажните синџири дека принудиле многу пиварници на банкрот со „деструктивна борба за пониски цени“. Во исто време, поради инфлацијата, пиварите се принудени да ги зголемат цените на своите производи.