Фрчат тужби, МЕПСО ги тужи фирмите за ланското влечење на струја
Од време на време добиваме и средства, така како што влегува прилив на нивните сметки, нема да застанеме додека не се наплатат долговите, но јасно е дека тоа е бавен процес, вели Орхан Муртезани, директор на АД МЕПСО
Ако некој влече струја од нашата преносна мрежа таа струја ќе треба да се плати и покрие, истакна директорот на МЕПСО, објаснувајќи што се случува со ланските долгови кои ги направија трговците со недозволеното влечење струја од системот.
– Доколку страната што влече струја не ја прифаќа таа влечена струја тогаш ние сме должни да постапиме согласно закон и да потегнеме судска процедура, така што има основ таа струја да се наплати. Ние навремено постапивме согласно закон и согласно одредбите од договорот и се блокирани сметките на сите фирми коишто навремено не ги извршуваат обврските. Од време на време добиваме и средства, така како што влегува прилив на нивните сметки. Истовремено ги потегнавме и сите судски процедури за тие побарувања да се наплатуваат по судски пат – појасни Муртезани, додавајќи дека наплатата ќе оди со години.
– Нема да застанеме се додека не се наплатат долговите, но јасно е дека тоа е бавен процес – додаде Муртезани.