ФОТО | Трогателната приказна која се крие зад чевлите на брегот на Дунав
На прв поглед, споменикот „Чевлите на брегот на Дунав“ делува како обична уметничка инсталација со десетици пара чевли, наредени на брегот на реката Дунав во Будимпешта, Унгарија.
Но, историскиот настан поради кој е поставен овој споменик е навистина трогателен. Имено, тој е посветен на жртвите кои се убиени и фрлени во Дунав за време на Втората светска војна, пишува „Б92“.
Ференц Салаши, чија идеологија била слична на онаа на Адолф Хитлер, бил на чело на Партија на стрелестиот крст, унгарска тоталитарна нацистичка партија. Се проценува дека тој е одговорен за смртта на околу 500 илјади Унгарци со еврејско потекло, а 20 илјади биле застрелани на брегот на Дунав. Тие им наредувале на жртвите да ги соблечат чевлите, а потоа безмилосно ги убивале, а телата им ги фрлале во реката.
„Чевлите на брегот на Дунав“ е мал потсетник на оваа ужасна историска етапа. Споменикот од леано железо, составен од 60 пара чевли од четириесеттите години на 20. век, е дело на филмскиот режисер Кан Тогај и уметникот Ѓула Пауер.
Машките работни чевли, женските потпетици и детските чевлички биле специјално избрани за да го претстават ужасот што не ги поштедил ниту жените, ниту децата.
Споменикот бил поставен на 16 април 2005 година.