После „Најсреќниот човек на светот“, Теона Стругар Митевска се враќа во Венеција со својот најнов филм „21 Ден до крајот на светот“ во програмата „Денови на Авторите“, која оваа година прославува 20 години од своето постоење, создадена од Италијанската асоцијација на режисери и автори.

Целта на оваа програма, пандан на Канската програма „Режисерски две недели“, е да се сврти вниманието кон висококвалитетно кино, без никакво ограничување, со посебна грижа за иновативност, истражување, оригиналност и независност.

Селекторите на оваа венецијанска секција која го промовира авторскиот филм го вклучија филмот на Теона во својата програма како неверојатно смел и искрен експериментален филм на автор кој секогаш изненадува.

– Сè започна за време на заклучувањето и изолацијата за време на ковид-пандемијата. Вознемиреноста беше во воздухот, но целото семејство беше среќно што беше заедно во куќата на нашето семејство надвор од Скопје, до денот кога умре нашиот чичко и јас, сите, бевме опкружени со смрт и стравот беше нашиот водич. Што ако е ова, а утре го нема, дали сум подготвена да ја прифатам сопствената кршливост, дали ќе умрам сама, дали ќе го оставам светот како што е, дали ќе се осмелам да одам на другата страна – ако има друга страна… сите овие дилеми ми ја стуткаа главата и со тоа ја доживеав неопходноста да се повлечам во себе и да се вратам во некоја исконска, сурова состојба на битието. Требаше да направам нешто. Сакав да излупам слоеви на потиснати емоции. Требаше да работам. Мојот концепт беше едноставен: ќе бројам 21 ден напред, што е еднакво на 21-дневно размислување за мојот живот. Во тој процес, пишував, снимав и ја создавав мојата најлична работа – објаснува Теона Стругар Митевска.

Македонскиот филм успева да има континуитет на најголемите филмски смотри, со тоа што секоја година македонскиот филм е присутен на сите европски фестивали.

– Секако, треба да се радуваме на нивните индивидуални успеси, но и на нашата кинематографија. Како Агенција за филм ги правиме сите напори постојано да го поддржиме и потврдиме потенцијалот на нашите таленти, кои не застануваат и нè тераат и нас да одиме напред со нив во оваа толку комплексна уметност – истакнува директорот на Агенцијата за филм, Бојан Лазаревски.

Новиот филм на Теона С. Митевска е копродукција помеѓу Македонија и Белгија.

– Да се биде во Венеција по втор пат во две години е огромна работа за секоја кинематографија, а да не зборуваме за македонската. Вакви успеси во континуитет не се баш вообичаени и за поголеми кинематографии и Македонија може да биде само горда. Да се биде во селекција која ги негува авторите и која секогаш била насочена кон авторството е голема чест. Селекторите на Венецијанските денови речиси ја прогонуваа Теона да го доврши и технички доуреди филмот за да го вклучат во програмата. Овој филм е поразличен од сè она што сме го виделе од Теона. Овој филм е нејзин експериментален личен дневник, создаден како комплетно независна продукција, со најминимални финансии, речиси целосно сработен само од Теона и едноставно е уникатен мал филм – изјави Лабина Митевска, продуцент на филмот.

Во последниве две недели минатогодишниот учесник на Венеција, филмот „Најсреќниот човек на светот“, освои дури четири награди, две на Бриселскиот интернационален филмски фестивал за најдобра глума на Јелена Кордиќ Курет и за наjдобар звук, како и две награди за најдобра глума на тукушто завршениот филмски фестивал во Пула, известија од продукцијата „Сестри и брат Митевски“.