Во изминатите неколку дена имавме интензивни разговори за коронавирусот со доктор Фабио Скано од Светската здравствена организација. Разговаравме за досегашното искуство, мерките и следните чекори за справување со епидемијата. СЗО е наш голем партнер, а нивниот претставник во земјава ни дава голема поддршка. Освен препораките и донациите кои ги добиваме од СЗО, добиваме и пофални зборови за активностите на нашиот медицински персонал, изјави на денешната прес конференција министерот за здравство Венко Филипче.

Тој рече дека нашата земја е соочена со посилен бран од првиот поради низата непочитувања на мерките за заштита од страна на граѓаните.

– Сега кога се враќаме во нормалните животни активности, потребно е секој од нас да даде колку што може повеќе за да ја надминеме оваа состојба – рече Филипче.

Скано пак истакна дека тоа што се гледа е загрижувачко, а вирусот нема наскоро да исчезне, туку тој уште извесен период ќе е присутен во нашите животи.

– Целта ми е да ги видам мерките кои се преземаат овде. Одговорот од страна на владата беше силен и навреме, и импресиониран сум од работата на вашите лекари. Повторното зголемување на случаевите е нешто што може да се изменаџира. И препорачуваме на Владата да ги следите сите состојби и секој случај да биде изолиран и тестиран, а ако е потребно и ставен во карантин – рече Скано.