Фестивалот „Акто“ во октомври ќе прикаже документарен филм и ќе постави изложба за Скопје
Програмата на фестивалот „Акто18“ за октомври, со наслов „Попаметен град 3.0 – Феникс или Апокалипса?“ предвидува едукација, изложба, проекција на филм и разговори, сето тоа испреплетено низ архитектурата, уметноста, филмот, театарот, а инспирирани од грижата кон другиот и просторите помеѓу.
Во амфитеатарот на Архитектонскиот факултет на 13 октомври (петок), во 19 часот, ќе биде прикажан документарниот филм „Витиќ танцува“ на концептуалниот интермедијален уметник Борис Бакал и уметничката организација „Фрлачи на сенки“, посветен на дваесетгодишната борба на станарите за обновување на Витиќевиот облакодер во Загреб, инаку ремек-дело на модернистичката архитектура, која на тој начин станува метафора на целото општество.
Филмот преку архивски снимки и сведоштва на поранешни и сегашни жители на Витиќевиот облакодер, архитекти, активисти и други инволвирани се обидува да воспостави свест за инфраструктурата во служба на заедницата. Тоа е зграда во која се рефлектираат сите клучни општествени моменти и несогласувања.
Вреден и долго запоставен споменик на културата, Витиќевиот облакодер истовремено е и показател за систематска негрижа кон социјалистичкото наследство, но и за парадоксот на поранешниот систем. Нормализацијата на клиентелизмот и корупцијата, недоволниот капацитет за домување во Загреб, систематското запоставување на јавните простори и отсуството на урбанистичко планирање се теми што се рефлектираат во филмот.
На 21 октомври (сабота), во 12 часот, во Киното на Железничка станица, ќе биде отворена изложбата „Попаметен град 3.0 – Феникс или апокалипса?“ Користејќи го Скопје како референтна точка, изложбата прикажува фотоколажи од градот – каков е денес и каков бил пред земјотресот, архивски филмови за периодот по земјотресот и многубројни монографии и книги за скопската „апокалипса“, како и неговиот подем како „феникс“.
Партнери на „Акто18“ се Институт за театар од Чешка / Прашко квадриенале за дизајн на перформанс и простор (PQ), ЗК/У-Берлин – Институт за уметност и урбанизам – Берлин, „Изолатциа“ – Киев, Украина, „Shadow Casters“ (Загреб), Архитектонски факултет – УКИМ Скопје.
Фестивалот е поддржан од Министерството за култура на Република Северна Македонија, „Trust for Mutual Understanding New York“, Фондацијата „Хајнрих Бол“, Институтот „Гете“, Европската Унија – проект „Острови на сродство“, проектот „Активен ГРА(Д)/ѓани“ и проектот „Не сакаме да бидеме ѕвезди, туку делови од соѕвездија“.