Актуелниот шампион во македонската ракометна Суперлига Еурофарм Пелистер ја продолжува победничката серија во плеј-офот.

Денеска битолската екипа ја оправда фаворитската улога славејќи против составот на Струга со конечен резултат 34:23.

Најзаслужни за триумфот на тимот на Бранислав Ангеловски беа Василев со шест и Цехте со пет голови.

Се одигра уште еден меч во кој Тиквеш триумфираше над Тинекс Пролет во Скопје со 26:23 најмногу благодарение на Манасков кој реализираше осум голови.

На табелата води Еурофарм Пелистер со 20 бодови, пред Охрид кој има 14, еден повеќе од Тиквеш на третата позиција. Вардар е на четвртото место со 12, колку што има и петтопласираниот Алкалоид. Следуваат Бутел Скопје (4), Тинекс Пролет (3) и Струга без ниту еден бод.