ЕУ ги прошири санкциите за Белорусија
Европскиот совет ги прошири санкциите за Белорусија кои имаат за цел усогласување на санкциите на ЕУ против Русија. Европската унија има за цел да ја спречи Русија од можноста да ги заобиколи санкциите преку таканаречените трети земји, соопшти Европската комисија.
Овие мерки ја прошируваат забраната за извоз во Белорусија на голем број високочувствителни стоки и технологии кои придонесуваат за воениот и технолошкиот напредок на Белорусија. Советот на ЕУ воведува и дополнителна забрана за извоз на огнено оружје и муниција, како и на стоки и технологија погодни за употреба во воздухопловната и вселенската индустрија.
Европската комисија ја поздрави одлуката на Советот на ЕУ и нагласи дека овие рестриктивни мерки се забрзани со оглед на итноста поврзана со борбата против заобиколувањето на одредени високо чувствителни стоки и технологии.