ЕМА: Вакцината на „Фајзер“ може да се чува на температура од -25 до -15 степени за период до две недели
Европската агенција за лекови (ЕМА) денеска соопшти дека транспортот и складирањето на вакцината на „Фајзер“ и „БајонТек“ против ковид-19 ќе може да се одвива на температура од -25 до -15 степени Целзиусови, односно на температури стандардни за фармацевтските фрижидери.
Одобрението е донесено по примерот на американската Агенција за храна и лекови (ФДА), која во февруари одобри вакцините на „Фајзер“ и „БајонТек“ да се чуваат на повисоки температури од претходно препорачаните.
Во соопштението на ЕМА се истакнува дека тоа ќе ја олесни брзата дистрибуција на вакцини во Европската Унија и ќе ја намали зависноста од складирање на многу ниски температури.
ЕМА наведе дека вакцините на „Фајзер“ и „БајонТек“ ако се складираат подолго од две недели тогаш е потребна температура од -90 до -60 степени Целзиусови, што е можно само во посебни фрижидери.
Претходно, ЕМА одобри нови фабрики за производство на вакцини против ковид-19 во Холандија, во Германија и во Швајцарија, со цел да се унапредат вкупните производствени капацитети и да се забрза имунизацијата во Европа.
Во Лејден, Холандија ќе се отвори нов погон за производство на вакцината „АстраЗенека“, во Марбург, Германија ќе се произведува вакцината на „Фајзер“, додека во Виспа, Швајцарија – „Модерна“.