Двотомна публицистичка посвета на Свето Стаменов кон македонскиот стандарден јазик
Стогодишнината од раѓањето на камен-темелникот на современата македонска култура, Блаже Конески, и 95-годишнината од смртта на, според многумина, најзнаменитиот Македонец на 20 век, Крсте Петков Мисирков, беа повод од печат да излезе двотомната книга „Јазикот – нашата единствена комплетна татковина“ (I-II) на Свето Стаменов, политиколог, новинар на Македонското радио – Радио Скопје и еден од најистакнатите и најплодни македонски публицисти.
Оваа двотомна книга е збирка од точно 50 интервјуа посветени на македонскиот стандарден јазик, кои беа реализирани во рамките на авторскиот проект „Quo vadis“ и на редовните програми „Актуелно“ и „Радио спектар“ на Македонското радио – Радио Скопје во периодот од 26 декември 2014 до 20 декември 2020 година и во кои истакнати македонски лингвисти, слависти и македонисти, универзитетски професори, научни и културни дејци – врвни познавачи на македонскиот стандарден јазик говорат за настанувањето, развојот и афирмацијата на македонскиот јазик, за проблемите со кои се соочува, за неговото место и улога во македонското општество, но и за предизвиците со кои тој се соочува, како и за тоа што треба да се направи за неговиот опстанок, развој и иднина.
Во интервјуата посебен акцент е ставен врз односот меѓу јазикот и националниот идентитет, меѓу јазикот и литературата и воопшто културата, меѓу јазикот и политиката, како и врз одбележувањето на значајни годишнини (70 години македонска граматика и македонски правопис, 75 години современ македонски јазик, азбука и правопис, 5 мај – Ден на македонскиот јазик…), како и врз двојазичноста, новото изменето, дополнето и проширено издание на Правописот на македонскиот јазик итн.
Посебно место во интервјуата им е дадено на најзаслужните личности за нашиот јазик Крсте Петков Мисирков, првиот кодификатор на македонскиот современ јазик, и на Блаже Конески, великанот на современата македонска култура и човекот кој е најзаслужен за конечната (официјалната) кодификација на македонскиот современ стандарден јазик, за неговиот развој и за неговата афирмација во светски рамки.
Во книгата „Јазикот – нашата вистинска комплетна татковина“ со свои мислења и ставови за македонскиот јазик настапуваат петнаесетина универзитетски професори, научни работници, македонисти и познати македонски лингвисти и слависти, како што се: проф. д-р Људмил Спасов, проф. д-р Димитар Пандев, проф. д-р Елена Јованова-Грујовска, академик проф. д-р Витомир Митевски, проф. д-р Снежана Веновска-Антевска, проф. д-р Искра Пановска-Димкова, проф. д-р Васил Тоциновски, проф. д-р Марија Коробар-Белчева, проф. д-р Снежана Велковска, д-р Татјана Б. Ефтимоска и д-р Славчо Ковилоски, како и Миле Попов, еден од бардовите на македонското радио спикерство, и новинарите Зоран Иванов, Тони Гламчевски и м-р Елизабета Кузмановска.
Инаку, Свето Стаменов, во рамките на одбележувањето на стогодишнината од раѓањето на Блаже Конески, во минатата 2021 година заедно со проф. д-р Вера Стојчевска-Антиќ беше приредувач на зборниците „Навраќање кон Конески“ и „Уште едно навраќање кон Конески“ во кои беа објавени осумдесетина трудови на македонски и странски автори посветени на ликот и делото на великанот Конески.
(Текстот е објавен во „Културен печат“ број 123, во печатеното издание на весникот „Слободен печат“ на 2-3 април 2022)