ДУИ против „струјата“ на Муса Џафери во Кичево: Внукот на Ахмети против фаворитот на ДУИ

Фатмир Лимани и Фатмир Дехари, кандидати за Кичево/ Фото: Фејсбук

Претстојните локални избори во една од поголемите општини во земјава според бројот на гласачи (околу 50.000) ќе донесат мошне интересен дуел, практично, меѓу двајца „интегративци“, иако едниот е поранешен функционер на ДУИ. Имено, Фатмир Лимани, внук на лидерот на ДУИ Али Ахмети, ја има поддршката на крилото на поранешниот висок функционер на ДУИ, Муса Џафери (иако јавно не е искажана).

Лимани како независен кандидат ќе се натпреварува за челната позиција на општината со кандидатот предложен од ДУИ Фатмир Дехари, инаку актуелен градоначалник на Кичево. Дехари ќе ја има поддршката и на коалицискиот партнер на ДУИ, СДСМ, и на овие избори ќе се обиде да го освои својот трет градоначалнички мандат.

Опозициската ВМРО-ДПМНЕ и коалицијата во Кичево ќе се натпреварува со доктор Александар Јовановски, поранешен професор во средното општинско училиште „Мирко Милески“, а сега лекар што работи во сопствена приватна здравствена установа. Кандидат на движењето „Македонска ера трета“ е Ѓорѓи Билески. Покрај четирите кандидатури за градоначалник, за Советот на Општина Кичево ќе се натпреваруваат и кандидатите од осум листи за советници.

Изборната програма на Фатмир Дехари, кој е доктор по општествени науки, најавува „Зелена агенда“, односно вложувања во ефективно управување со отпадот, завршување на канализациските мрежи, обезбедување чиста вода за пиење, гасификација, патеки за трчање и возење велосипед, паркинзи, зеленило. Исто така, и електронска администрација на општината, а нула толеранција за отпад, злоупотреби, корупција итн.

– Сметам со поддршката на граѓаните на Кичево да продолжиме со праведно, добро владеење и во следниот мандат 2021-2025 – изјави Дехари.

Програмата на независниот кандидат Лимани, кој е професор по историја и поранешен заменик-директор на ЕСМ, се потпира на финансиска отчетност, транспарентност, отворено партнерство и соработка, меритократија, подобри услови за образование, здравство, како и приоритет при вработување и грантови за млади парови.

– Целта ни е да изготвиме локална економска програма за да го развиеме земјоделството и сточарството. Грижата за планините, шумите и животната средина е исто така наш приоритет – вели Лимани.

Јовановски, покрај урбанизација на градот и проекти од екологијата, ветува дека ако стане градоначалник, општината ќе додели стипендии за ученици и студенти од социјално загрозени семејства.
– Гасификацијата е наш приоритет, со надеж дека во најскоро време ќе заврши изградбата на магистралниот крак – вели Јовановски.

Билески својата програма ја сублимира во четири целини – екологија, стопанство, инфраструктура, спорт и рекреација.

– Ќе разговараме со првите луѓе на РЕК „Осломеј“ за намалување на емисијата на штетни честички, како и за почести мерења на амбиенталниот воздух околу објектот – истакна Билески.

 

Видео на денот