Дресот на Диего Марадона што легендата го носеше на СП 1986 и во кој го постигна прочуениот гол со „божја рака“, а кој се очекува наскоро да биде продаден на аукција и да достигне вредност околу 4,8 милиони евра, не е автентичен. Ова го тврди ќерката на Диего Марадона, Далма. Таа тврди дека на аукција ќе се најде дресот на Марадона што тој го носел на првото полувреме од мечот на неговата Аргентина со Англија. Но Марадона на полувремето го заменил дресот, а во второто полувреме го постигна прочуениот гол во друг дрес.

Поранешниот англиски репрезентативец Стив Хоџ тврди дека го добил тој дрес на крајот на споменатиот меч во Мексико Сити и сега сака да го продаде на аукција.

– Тоа не е дресот што татко ми го носеше во второто полувреме. Сигурна сум дека Хоџ го нема тој дрес, а знам кој го има. Не сакам да кажам кој го има вистинскиот дрес. Тако ми ми кажа „како да му го дадам дресот на мојот живот“ (на Хоџ н.з.)? Тој поранешен играч мисли дека го има дресот на татко ми од второто полувреме, но не е така. Тој дрес е од првото полувреме – вели Далма.

Нејзиното тврдење го демантира аукционерската куќа Сотеби која ќе го продава дресот.

Во своите мемоари “Допрен од Бога“ самиот Марадона, кој почина во 2020 година, вели дека го заменил дресот од второто полувреме со Хоџ. И Хоџ во својата автобиографија тврди дека по мечот на патот кон соблекувалната му понудил на Марадона да ги разменат дресовите, а овој прифатил.

Аргентина ја победи Англија со 2-1 во четвртфиналето, а двата гола ги постигна Марадона. Првиот гол Диего го постигна со рака, односно „со божја рака“ како што самиот потоа рече. Ааргетина го освои тоа СП, победувајќи ја Германија во финалето (3-2).