Драги свикува итен самит на Г-20 поради состојбата во Авганистан
Италијанскиот премиер Марио Драги планира да свика итна средба на врвот на Г -20, на која ќе се разговара за ситуацијата во Авганистан, објави „Ла Република”.
Претходно закажаниот самит на Г -20 треба да се одржи во Рим на 30 и 31 октомври оваа година, но според изданието, кабинетот на Драги работи на одржување на вонреден состанок на шефовите на држави или влади на дваесет водечки економии во врска со преземањето на власта на талибанците во Авганистан.
Драги утрово имал телефонски разговор со германската канцеларка Ангела Меркел, каде разговарале за ризичната состојба во Авганистан, како и за заштитата на населението кое треба да биде евакуирано од земјата.
Драги соопшти дека Италија е отворена за авганистанските мигранти, откако тој потврди во парламентот дека неговата земја ќе ги прифати бегалците.
„Ние ќе ги браниме тие што се со нас“ изјави Драги во собранието на Италија.
Иако многу од европските земји се двоумат за прифаќањето на авганистанските државјани, Италија уште од почетокот ја искажа својата поддршка за прифаќањето на населението.