Првиот долгометражен документарен филм за Блаже Конески со наслов „Јанѕа“, снимен според мотиви од „Дневник по многу години“ на Конески, од истакнатиот македонски документарист, Никола Т. Калајџиски, на 16 и 17 ноември има проекции во Струга.

Документарниот филм „Јанѕа“ е подготвуван и сниман во период од три години и го следи животот и делото на професорот, академик, поет и еден од кодификаторите на македонскиот литературен јазик, Блаже Конески.

Огромното значење на делото на Конески за македонската култура и наука и, воопшто, за нашата држава се претставува преку кажувањата на повеќе истакнати академици, универзитетски професори и научници / истражувачи од областа на македонистиката и од областа на лингвистиката, книжевната наука и културологијата, вклучително и странски македонисти кои важат за познавачи на делото на великанот – негови современици и потомци.

Сценаристот и режисер на филмот, познатиот документарист Никола Т. Калајџиски, зад себе има кариера со голем број документарни филмови кои се прикажувани на домашни и меѓународни фестивали. Овој негов најнов филм, посветен на централната личност на македонскиот 20. век, се очекува да фрли нова светлина врз ликот и делото на Конески, затоа што не само што во целост го претставува неговиот влог за македонската култура и наука, како и воопшто за современата македонска држава, туку опфаќа и димензии на неговата личност кои не се многу коментирани во досегашните осврнувања за великанот и малку познати сегменти од неговата биографија.

Монтажата е на Аристид Филактов, композитор на музиката е Златан Миливоевиќ, а дизајнер на звук е Дарко Спасовски. Како директори на фотографија се јавуваат Дејан Димески и Петар Кочишки.

Филмот е подготвен во продукција на „Контраст филм“, а продуцент е Златко Димески. Филмот се остварува сo поддршка од Агенцијата за филм на Северна Македонија.

По премиерите во Скопје и Битола, филмот го продолжува својот пат во останатите наши градови. На 16 и 17 ноември има проекции во Струга, а следуваат проекции на филмот и во Штип на 28 ноември, како и во Прилеп на 13 декември.