Градоначалникот на Куманово, Максим Димитриевски, реагираше за акцискиот план кој го даде поранешниот премиер Љубчо Георгиевски за тоа како да се реши спорот со Бугарија.

– Акцискиот план којшто го предложи поранешниот премиер Љупчо Георгиевски е срамен и понижувачки за Македонија и македонскиот народ. Овие ставови директно ги разнебитуваат нашите македонски корени, ги поткопуваат столбовите на постоењето на македонската држава, историја, јазик, идентитет и култура со конечна цел декодифицирање на македонизмот. Доколку кај поранешниот премиер постои малку доблест и свест, под итно треба да го врати македонското државјанство и да се извини на целиот македонски народ, напиша Димитриевски на социјалните мрежи.

Исто така, Димитриевски го повикува и Јавното обвинителство екс официо да отвори случај, да спроведе истрага и доколку утврди одговорност за ваквиот предлог кој е противуставен, тогаш да поднесе кривична пријава за дело против државата и поткопување и уривање на уставниот поредок.

– Јас сум еден од многуте граѓани во државата кој секогаш и секаде бескомпромисно ќе се спротивстави на ваквите утопистички ставови. Во оваа прилика ќе потсетам на зборовите на Гоце Делчев: Јас не познавам друг народ кој повеќе страдал од предавствата на своите синови – изроди како македонскиот, напиша Димитриевски.

Екс премиерот Љубчо Георгиевски: 5 политичко-дипломатски предлози како да се подобрат македонско – бугарските односи