Доктор Злате Мехмедовиќ од Здравствен дом Скопје, кој во првите борбени редови ги лекуваше пациентите со ковид во минатите бранови, а и меѓу првите во државава алармираше за појавата на омикрон варијантата и нејзината заразност, за „Слободен печат“ вели дека бројките на новозаразени кои се регистрираат секојдневно, не кореспондираат на реалноста.

Според него, бројот на ковид позитивни секој ден изнесува околу 20 илјади граѓани. Меѓутоа, во системот на Институтот за јавно здравје не се евидентирани, затоа што својот резултат го потврдуваат со брз и евтин тест од аптека, или пак воопшто не го потврдуваат, туку само ги лекуваат симптомите. Според доктор Мехмедовиќ, недозволиво е да се дозволува граѓаните да се заразуваат со темпото со кое тоа сега се случува. Властите мора да воведат рестриктивни мерки, со цел да му застанат на патот на вирусот или барем да го забават неговото ширење.

-Апсолутно е логично да има превентивни мерки, да се намали присуството во угостителските објекти и кафеаните, а ковид пропусниците да го добијат своето вистинско значење. Не може 100 проценти од населението да има вакцинален сертификат, а само 40 проценти да се вакцинирани и прележани во реалноста. Сценариото со омикрон кое го живееме во моментот е среќна варијанта, затоа што не создава тешка форма на болеста. Но, со омикрон има проблем, а тоа е што преносливоста на вирусот од човек на човек, може да создаде нови варијанти кои ќе измутираат уште повеќе, а некои од тие мутации може да се поопасни, објаснува доктор Мехмедовиќ.

-Постојат варијанти за лоши сценарија во иднина со реални можности. Тие варијанти не се дефинитивни, но може да се случат. Може да се случи во иднина да има послаби варијанти од омикрон, ама има и можност, односно емпириски е докажано, дека може да има и функционално унапредување на вирусот, односно да биде полош, објаснува Мехмедовиќ.