ЦИВИЛ ќе одржи шест прес конференции во текот на изборниот ден (15 јули) и тоа во 8, 10, 13, 16, 18 и 22 часот. Веднаш по завршувањето на прес конференцијата во 22 часот, ќе се одржи панел дискусија за оценка на изборниот процес, со учество на членови на тимот на ЦИВИЛ, како и Сашо Орданоски, Јасна Бачовска Висар Адеми. Прес конференциите и панел дискусијата ќе се пренесуваат во живо на Фејсбук страницата на ЦИВИЛ. Сите медиуми се добредојдени да ги преземаат видео содржината и извештаите на ЦИВИЛ.

Прес центарот на ЦИВИЛ на 15 јули ќе биде во хотел Порта, Аеродром. Организацијата ќе обезбеди бесплатен такси превоз за сите новинарски екипи до хотелот (потребно е да се приложи уредна сметка). Во прес центарот ќе биде обезбеден и простор за новинарските екипи за работа, закуска и освежување.

Граѓанската асоцијација МОСТ ќе одржи четири прес конференции, кои ќе се одржат во 9, 11, 15, и 19 часот.

Државната изборна комисија ќе одржи седум прес конференции, во 9.30, 11.30, 13.30, 15.30, 17.30, 19.30 и 21.00 часот како и дополнителна прес конференција за соопштување на првичните неофицијални резултати.

ЦИВИЛ ги набљудува изборите со 314 набљудувачи, од кои сите се мобилни. Тие го набљудуваат процесот во 16 категории, вклучувајќи ја и новата категорија што се однесува на почитувањето на мерките за заштита од коронавирусот.

Изборите ги набљудуваат осум акредитирани граѓански организации од земјата со вкупно 2.508 домашни набљудувачи. Акредитирани се и 21 меѓународни набљудувачки мисии, вклучувајќи ги и амбасадите со 154 набљудувачи и преведувачи.

ДИК акредитира 55 странски новинари што ќе известуваат на 15 јули.