Чави и порача на управата: Сакам да го имам Дембеле во тимот и следната сезона
Тренерот на Барселона, Чави Ернандез смета дека Осман Дембеле по секоја цена мора да остане на „Камп Ноу“ и управата мора да стори сè за да потпише нов договор со францускиот репрезентативец.
Договорот на Дембеле со Барселона истекува на крајот од месецов, а сите преговори за продолжување на соработката не беа успешни.
Но, Чави на последниот состанок во управата на Барселона јасно и порача дека сака Дембеле да остане во тимот и следната сезона.
– Крилото што го сакам за следната сезона е Дембеле и мораме да ги истражиме сите опции кои ги имаме и да потпишеме нов договор со него – им рекол Чави на челниците на Барселона.
Осман Дембеле во Барселона пристигна во 2017 година од Борусија Дортмунд за рекордни 140 милиони евра. По неговото пристигнување на „Камп Ноу“, францускиот репрезентативец постојано беше на удар на јавноста и на навивачите поради слабите игри, неспортскиот живот, но со доаѓањето на Чави за тренер, работите драстично се променија. Дембеле одигра фантастична сезона и беше еден од најдобрите играчи на Барселона.
Самиот фудбалер во неколку наврати порача дека сака да остане во Барселона се додека Чави седи на клупата, но проблем прави неговиот агент кој инсистира Дембеле да потпише за ПСЖ или за заинтересираните англиски премиерлигаши бидејќи му нудат поголема плата.