Новите услови што се испречија пред Македонија на патот кон ЕУ и најавите како онаа на еврокомесарот за проширување Оливер Вархељ дека Албанија може наскоро да ги почне преговорите за членство, а Македонија нема се додека не го реши спорот со Бугарија, го нарушуваат интегритетот на самата Унија и прават Македонија да изгуби секаков интерес за компромиси, вели аналитичарот и правник Владимир Бошњаковски за „Слободен печат“.

– Ваквите ставови се големо разочарување не само за нашата држава, туку за секој што сака да ја види ЕУ како геополитичка сила во современиот свет. Македонија направи големи компромиси, а лидерите на земјите-членки доаѓаа кај нас како морални гаранти на интеграцискиот процес. Се покажа дека нивните гаранции не значат ништо, па затоа веќе и не може да се третираат многу сериозно. Во однос на Македонија, колку и да звучи парадоксално, нејзините опции се многу едноставни. Има две опции: да прифати уште еден болен компромис веднаш или да се откаже од идејата за зачленување во Унијата, а својот пат на развој да го трасира на друг начин. Најлошото што може да направиме е да потрошиме уште 30 години енергија и надежи за решавање на новиот билатерален спор, а на крајот пак да прифатиме исход кој и денес е на маса – вели Бошњаковски за „Слободен печат“.

Додава дека тој лично под нормални околности можеби и би бил спремен на компромиси, но се покажало дека тие не се никаква гаранција за посакуваниот исход.

– Така, идните компромиси треба да се прават само и исклучиво ако се врзани со конкретни исходи и се реверзибилни во случај на нови блокади. Тоа е нешто што требаше да се бара и претходно.  Доколку тоа не е прифатливо, ние функционираме без ЕУ 30 години, па сите сме живи и здрави. Главна придобивка од откажувањето од тој аспект за развој на нашата држава е што со неа ќе исчезне и илузијата дека ќе дојде некој од ЕУ да ни ги реши домашните проблеми. Можеби без „туторството“ на ЕУ ќе бидеме приморани да се однесуваме малку поодговорно, а билатералните спорови ќе ги решаваме натенане – вели Бошњаковски.