Бесими: Обезбедена финансиската рамка за гасоводот кон Грција

Фатмир Бесими / Фото: Министерство за финансии

Обезбeдени се средства за реализација на проектот за изградба на интерконективен гасовод меѓу Република Северна Македонија и Грција, информира министерот за финансии Фатмир Бесими по потпишувањето на Договорот за гаранција со потпретседателката на Европската инвестициска банка, Лилјана Павлова. Воедно се потпиша и финансискиот договор меѓу Национални енергетски ресурси (НЕР) и ЕИБ. Вкупната инвестициска вредност на проектот изнесува 57,8 милиони евра, при што со потпишување на конкретниот договор за заем се обезбедуваат 28,9 милиони евра.

Како што посочи Бесими, преку инструментот ВБИФ се обезбедуваат дополнителни 12,4 милиони евра како инвестициски грант, којшто ќе го управува Европската инвестициска банка, за што, исто така, беше потпишан договор меѓу НЕР и ЕИБ. Преостанатите 16,5 милиони евра ќе се обезбедат од ЕБОР за што Владата во наредниот период ќе поднесе посебен Предлог-закон за гаранција.

-Проектот за изградба на гасоводот е еден од најприоритетните проекти за двете држави, за регионот, како и за Енергетската заедница и е поддржан од сите релевантни европски институции. Реализацијата на овој проект ќе обезбеди стабилност во снабдувањето со енергија, пред сè во индустријата, што ќе доведе до економски развој на сите региони во Република Северна Македонија, нагласи министерот Бесими на потпишувањето на Договорот.

Проектот „Интерконектор за пренос на природен гас Грција – Северна Македонија, дел на Северна Македонија”, како што вели министерот Бесими, е од стратешко значење за нашата земја. Неговата имплементација ќе придонесе кон обезбедување забрзан и одржлив економски раст, повисок животен стандард и подобар квалитет на живот на граѓаните.

Притоа, министерот Бесими се заблагодари на континуираната поддршка што ЕИБ ѝ ја дава на нашата земја.

Потпретседателката на Европската инвестициска банка Павлова рече дека како Банка на ЕУ и дел од Тим Европа, ЕИБ со задоволство го поддржува овој приоритетен проект на ЕУ, дел од Економскиот и инвестициски план, што е стожер на националната Стратегија за енергетика на Република Северна Македонија.

-Исто така, проектот е поврзан и со претходната заложба на Банката кон зајакнување на енергетската сигурност на Западен Балкан преку намалување на зависноста од само еден извор на снабдување со гас. Истиот ќе овозможи пристап до разни извори, ќе обезбеди снабдување во случај на недостиг и ќе ја зголеми пазарната конкуренција преку поврзување со сѐ подиверзифицираниот пазар на природен гас во Грција. Како приоритетен проект за Европската Унија и за Иницијативата за гасно поврзување на Централна и Југоисточна Европа (CESEC), ќе му помогне на регионот постепено да го елиминира јагленот, и притоа да ја зголеми поврзаноста и да создаде услови за заеднички регионален пазар, како и за привлекување нови инвестиции, истакна Павлова.

Проектот ќе го имплементира Акционерското друштво за вршење енергетски дејности „Национални енергетски ресурси” – Скопје, во државна сопственост. Неговата реализација е предвидена и со Буџетот за 2022 година во кој капиталните инвестиции се на историски највисоко ниво.

Извор: МИА

Видео на денот