Арсовска не мисли да дава оставка: Ако не се изгласа буџетот на Градот, ќе има избори за Совет
Градоначалничката на Скопје, Данела Арсовска, вели дека не размислува за оставка, туку дека се можни избори за Советот како што беше случај во Општина Тетово, доколку не биде изгласан буџетот на Град Скопје за 2023 година. Арсовска ова го изјави вечерва во интервју за „Телма“.
„Доколку советниците одлучат дека не треба да поддржат функционален буџет за граѓани, за реализација на проектите и за модерно Скопје, тогаш, по автоматизам, нивниот мандат престанува и ќе си одат на локални избори и ќе си дојдат советници кои ќе работат во интерес на граѓаните. Меѓутоа, мој личен впечаток е дека таму има искусни луѓе, и во политиката и како советници, и никој не би понел таква политичка штета по нив. Мене ми е јасно дека на двете најголеми политички партии во државата не им е мило да видат дека некој поединец се обидува да смени нешто што се случува и во градот и во државата. И тоа е нивно легитимно право“, рече Арсовска.