Албанскиот селектор по жрепката за ЕП: Во нашата група недостасуваат уште само Бразил и Аргентина
Со жрепка ги дознавме сите групи на Европското фудбалско првенство кое ќе се одржи следната година во Германија.
Албанската репрезентација преку квалификациите обезбеди пласман на ЕП, а таму ќе игра против еден од најквалитетните репрезентации на континенталниот собир, Шпанија, Италија и Хрватска.
Албанскиот селектор, Бразилецот Силвињо ја коментираше групата, воедно малку и се шегуваше свесен дека неговите фудбалери добија силни ривали кои се очекува да бидат фаворити за титулата:
– Недостасуваат уште само Бразил и Аргентина. За Албанија секој избор би бил тежок. На Европското првенство нема лесни противници. Добивме репрезентации кои имаат огромно искуство да играат на вакви турнири. Тоа е голем предизвик за нас. Сите се фаворити против нас, но беа и Полска и Чешка. Работев во Италија, живеев и играв во Шпанија. Ги знам и двата фудбалски менталитети. Можеби ќе ми помогне подобро да го подготвам тимот – рече Силвињо.
Првиот меч на ЕП Албанија ќе го има на 15 јуни против Италија во Дортмунд, четири дена подоцна во Хамбург се среќава со Хрватска, а на 24 јуни против Шпанија во Дизелдорф.